UNESCO einn af meðskipuleggjendum Velsældarþingsins

Menningarmálastofnun Sameinuðu þjóðanna, UNESCO, verður einn af meðskipuleggjendum Velsældarþings 2025 sem fram fer á Íslandi dagana 8. - 9. maí, 2025. UNESCO er leiðandi aðili á heimsvísu í að efla frið, menningarlegan skilning og sjálfbæra þróun. Þátttaka UNESCO á Velsældarþinginu mun styrkja verulega umræður um aðgengilegra og réttlátara hagkerfi sem byggir á mælikvörðum um velsæld; þ.e. félagslegum og umhverfislegum þáttum auk hinna efnhagslegu.

Gustavo Merino, sviðsstjóri félagsmála hjá UNESCO, stýrir þriðja dagskrárlið Velsældarþingsins sem ber yfirskriftina „Velsæld er snjöll hagfræði“ frá kl. 11:00 til 12:00 í Silfurbergi í Hörpu,  þann 8. maí. Gustavo hefur mikla reynslu af samfélagsmálum og hefur gegnt lykilhlutverki í að móta stefnu UNESCO til að efla  sameiginlega velsæld, alþjóðlegt samstarf og sjálfbæra þróun (https://www.unesco.org/en).

Gustavo Merino, sviðsstjóri félagsmála hjá UNESCO

Eleonora Lamm, sérfræðingur í lífsiðfræði og lögum, er lykilmaður í ráðgjafarnefnd (Advisory Board) Velsældarþings 2025. Elenora er með rúmlega 18 ára reynslu af störfum sem snúa að mannréttindum, jafnrétti kynjanna, vísindum og siðfræði.  Hún er með doktorsgráðu í lífsiðfræði og lögfræði frá Háskólanum í Barcelona og hefur verið ráðgjafi í alþjóðlegri stefnumótun innan samtaka á borð við UNESCO, UN Women, Alþjóðavinnumálastofnunina (ILO) og OHCHR.

Eleonora Lamm

Þátttaka UNESCO í Velsældarþinginu 2025 mun færa viðburðinum dýpri innsýn í hvernig hægt er að endurskilgreina lykilviðmið hagkerfisins til að auka velsæld og skapa réttlátari framtíð fyrir alla.