Forseti Slóveníu heimsækir Ísland
- Elín Hirst
- 5 days ago
- 2 min read
Updated: 3 days ago
Halla Tómasdóttir og Nataša Pirc Musar ræða um velsæld í Veröld.
Þessi grein birtist upphaflega á vef embættis forseta Íslands: https://www.forseti.is/frettir/forseti-sloveniu-heimsaekir-island
Forseti Slóveníu, Nataša Pirc Musar, heimsækir forseta Íslands, Höllu Tómasdóttur 15. apríl 2026 í tengslum við árlegt Velsældarþing (Wellbeing Economy Forum) sem fram fer í Reykjavík. Forsetarnir hittast á tvíhliða fundi fyrir hádegið og snæða síðan hádegisverð með forsætisráðherra, Kristrúnu Frostadóttur. Síðdegis verður opinn viðburður í Veröld — húsi Vigdísar, þar sem forsetarnir taka þátt í samtali undir yfirskriftinni „Kærleiksríkt hugrekki: Forystuhlutverk í breyttum heimi” („The Courage to Care: Leadership in a Changing World“).
Forseti Íslands, sem er verndari Velsældarþingsins, hefur lengi lagt áherslu á mikilvægi þess að efla samtal um nýjar leiðir og viðmið í efnahagsmálum. Heimsókn forseta Slóveníu til Íslands undirstrikar mikilvægi alþjóðlegs samtals og samvinnu um þróun efnahagskerfa þar sem velsæld fólks og náttúru er höfð að leiðarljósi. Táknrænt er að kvenleiðtogarnir hittist í Veröld — húsi Vigdísar Finnbogadóttur, sem var fyrsta konan sem var kosin forseti í lýðræðislegri kosningu í heiminum árið 1980. Auk þess er 15. apríl afmælisdagur Vigdísar.
Á formlegri dagskrá Velsældarþings, sem verður haldið í Silfurbergi í Hörpu dagana 16. og 17. apríl, koma saman leiðtogar, stjórnmálamenn, hagfræðingar, fulltrúar atvinnulífs, alþjóðlegra stofnana og frjálsra félagasamtaka. Á þinginu verður rætt um hvernig þróa megi efnahagskerfi á alþjóðavísu sem þjóna fjölbreyttum þörfum samfélaga. Fremur en að horfa eingöngu til hagvaxtar og vergrar landsframleiðslu leggja þingfulltrúar áherslu á velsæld og almennari mælikvarða þar sem hugað er að þáttum á borð við lýðheilsu, sjálfbærni, félagslegt réttlæti og umhverfisvernd.
Velsældarþing er nú haldið í fjórða sinn á jafnmörgum árum. Embætti landlæknis skipuleggur þingið í samstarfi við JA PreventNCD, sem er styrkt af EU4Health áætlun Evrópusambandsins. Meðal annarra innlendra og erlendra samstarfsaðila þeirra eru embætti forseta Íslands, heilbrigðisráðuneytið, Reykjavíkurborg, Samband íslenskra sveitarfélaga, Festa – miðstöð um sjálfbærni, Wellbeing Economy Alliance, Wellbeing Economy Governments, Alþjóðaheilbrigðisstofnunin, Efnahags- og framfararstofnun OECD, The B Team, Club of Rome og Earth4All.
_edited.png)
