Meistaranám í velsældarfræðum á Íslandi hlýtur rausnarlegan styrk

Nýtt meistaranám í velsældarfræðum er eitt af 19 verkefnum sem hljóta styrk úr sjóðnum Samstarf háskóla á Íslandi, samtals að upphæð 60.396.000 ISK (420.000 evrur). Námið er samstarfsverkefni Háskólans í Reykjavík, Háskóla Íslands, Háskólans á Akureyri, embætti landlæknis og Surrey-háskóla í Englandi. Áslaug Arna Sigurbjörnsdóttir, fyrrum háskóla-, iðnaðar-  og nýsköpunarráðherra, tilkynnti úthlutun styrksins.

Velsældarhagkerfi fer lengra en hin hefðbundna efnahagslega nálgun sem einblínir eingöngu á efnahagslega mælikvarða við mat á árangri. Í staðinn mælir það velmegun og lífsgæði í gegnum mælikvarða sem meta meðal annars félagslega- og umhverfislega þætti auk hinna efnahagslegu.

„Nýja meistaranámið í velsældarfræðum er frábært tækifæri til að þjálfa næstu kynslóð leiðtoga í opinbera geiranum, einkageiranum og þriðja geiranum. Við þurfum nýtt hagkerfi sem leggur áherslu á vellíðan fólks og vistkerfisins á sjálfbæran hátt. Til að ná þessu markmiði þurfum við nýja færni og nýja þekkingu. Ísland er leiðandi í heiminum varðandi þessa umbreytingu með sinni áherslu á velsæld.“ segir Lorenzo Fioramonti, prófessor við Surrey-háskóla og fyrrverandi menntamálaráðherra á Ítalíu.

Á meðfylgjandi mynd, frá vinstri, Brynja Björk Magnúsdóttir, deildarforseti sálfræðideildar við Háskólann í Reykjavík, Elín Hirst, verkefnastjóri velsældarhagkerfis hjá embætti landlæknis, Áslaug Arna Sigurbjörnsdóttir, fyrrum háskóla-, iðnaðar-  og nýsköpunarráðherra, Stefán Hrafn Jónsson, forseti Félagsvísindasviðs Háskóla Íslands, og Sigurður Kristinsson, deildarforseti Félagsvísinda við Háskólann á Akureyri. Dóra Guðrún Guðmundsdóttir, sviðsstjóri lýðheilsu hjá embætti landlæknis, og frumkvöðull verkefnisins, er ekki á myndinni.