Alþjóðlega hamingjudeginum fagnað með dansi og söng á Íslandi

Aþjóðlegi hamingjudagurinn var haldinn hátíðlegur í ráðstefnusal Háskóla Íslands þann 20. mars, 2025. Þema ráðstefnunnar í ár var Kærleikur og samkennd. Embætti landlæknis skipulagði viðburðinn og María Heimisdóttir, landlæknir, flutti opnunarræðu.

Halla Tómasdóttir, forseti Íslands, og Björn Skúlason, eiginmaður hennar, voru viðstödd, en sem forseti hefur Halla sett kærleika og samkennd í forgang. Forseti Íslands er dyggur stuðningsmaður Riddara kærleikans og Kærleikssjóðsins, sem stofnaður hefur verið til minningar um Bryndísi Klöru Birgisdóttur, unga stúlku sem lést á hörmulegan hátt í ágúst 2024. Sjóðnum er ætlað að auka kærleika í samfélaginu og styðja við verkefni sem auka vellíðan og öryggi ungs fólks á Íslandi.

Dr. Dóra Guðrún Guðmundsdóttir, sviðsstjóri lýðheilsu hjá embætti landlæknis og stofnandi Velsældarþings, afhenti forseta Íslands fyrsta spilastokkinn sem tileinkaður er Riddurum kærleikans. Spilastokkurinn inniheldur 52 ráð sem eiga að efla kærleika og samkennd. Þá var efnt til gleðidans undir stjórn leikkonunnar Eddu Björgvinsdóttur. Að lokum var fjöldasöngur en Eggert Benedikt Guðmundsson frá forsætisráðuneytinu lék undir á gítar.

Hinar grípandi framsögur, hvetjandi stemning og þátttaka gesta af miklum áhuga gerðu viðburðinn afar vel heppnaðan. Meðal fyrirlesara voru Hera Fönn Lárusdóttir, 14 ára nemandi við grunnskóla Hveragerðis, Sigrún Daníelsdóttir, verkefnastjóri geðræktar hjá embætti landlæknis, Viðar Halldórsson, prófessor við Háskóla Íslands og Kári Einarsson, formaður nemendafélags Verzlunarskóla Íslands. Fundarstjóri ráðstefnunnar var Elín Hirst, verkefnastjóri Velsældarþings hjá embætti landlæknis.